Поетско музичка вечер „За тебе љубов моја“ претставува едно од најпрепознатливите културни случувања во Гевгелија, кое годинава се одржува по 28. пат. Настанот ќе се одржи на 5 март во хотелот „Аполонија“ во Гевгелија. Темата на вечерта традиционално е посветена на жената во сите нејзини улоги – жена, мајка, баба, сакана. Рецитираат песни исполнети со топлина, љубов, нежност и
почит, создавајќи атмосфера исполнета со искрени емоции. Оваа година специјален гостин е поетот Никола Маџиров, чиј настап го збогатува настанот со интернационална уметничка тежина.
Со текот на времето оваа вечер прерасна во најпознатата поетска манифестација во градот и веќе долго се смета за негов неофицијален културен бренд. Секоја година привлекува голем број посетители, љубители на поезијата и музиката кои доаѓаат да уживаат во посебната атмосфера што ја создаваат учесниците.
Она што ја прави оваа вечер уникатна е учеството на рецитатори од најразлични професии – професори, лекари, правници, економисти, инженери и многу други. Иако нивните кариери не се поврзани со уметноста, тие изненадуваат со извонредна сценска изведба, посветеност и емоција додека рецитираат. Нивната умешност покажува дека љубовта кон поезијата нема професионални граници и дека секој може да го донесе тихот до срцата на публиката.
Снимките од манифестацијата што се продукт од одржаната вечер, често ги користат наставниците по македонски јазик и литература како дидактички материјал во наставата, што сведочи за нејзината образовна и културна вредност.
Организатори на манифестацијата се професорите Даниела Џишева и Тони Аврамов, а покровител е Општина Гевгелија.
